Grunnskólinn í Þorlákshöfn fékk afhent menntaverðlaun Samtaka sunnlenskra sveitarfélaga 2011 þann 24. janúar sl. Hr. Ólafur Ragnar Grímsson forseti afhenti verðlaunin í hátíðarsal Fjölbrautaskóla Suðurlands en þetta var í fjórða sinn sem verðlaunin voru veitt. Meðal þess sem nefnt var í tilnefningu skólans voru námslegar framfarir en skólinn hefur náð frábærum árangri í samræmdum prófum undan farin ár. Annar punktur var samþætting á leiklist og tónlistarlífi inn í skólastarfið en mjög öflugt samstarf er við Tónlistarskóla Árnesinga og hefur það samstarf lagt grunn að því menningarlífi sem bæjarfélagið býr að og er einmitt til þess tekið í rökum þeirra sem sendu inn tilnefningar að með starfi skólans hafi verið lagður sterkur grunnur að því blómstrandi menningar og listalífi sem einkennir bæjarfélagið. Þá er grunnskólinn Grænfánaskóli þar sem nemendur vinna af metnaði að umhverfismálum. Grunnskólinn í Þorlákshöfn er skóli í ungu og barnmörgu samfélagi þar sem fjölmenning er hátt hlutfall eða um 14 % og hefur skólanum tekist vel að sameina ólíka nemendur með fjölbreyttu starfi þar sem allir hafa möguleika á að finna sinn farveg. Þetta er mikil viðurkenning fyrir starfsfólk, nemendur, foreldra og skólasamfélagið í Þorlákshöfn og uppskera fyrir mikið og óeigingjarnt starf í mörg ár.

Á meðfylgjandi myndum, sem Hrafnkell Karlsson tók, má sjá Halldór Sigurðsson skólastjóra taka við menntaverðlaununum úr hendi forseta Íslands og svo fulltrúa nemenda úr grunnskólanum þær Agnesi Rut Arndal Erlingsdóttur, Aðalbjörgu Ýr Sigurbergsdóttur og Ingibjörgu Hjörleifsdóttur ásamt Jóni H. Sigmundssyni aðstoðarskóla- stjóra, Halldóri Sigurðssyni skólastjóra og Ólafi Ragnari Grímssyni forseta.